Maxfiylik siyosati

Kuchga kirgan sana: 2026-yil 6-sentabr

Bu hujjat kometa.com.uz saytida, Kometa va Kometa Biznes ilovalarida qanday maʼlumot yigʻilishini, u nima uchun kerakligini va kimga berilishini tushuntiradi. Umumiy gaplar emas — quyida haqiqatda saqlanadigan maydonlar sanab oʻtilgan.

1. Maʼlumotlarni kim boshqaradi

Maʼlumotlaringizni YaTT Ismaylov Inomjon (STIR 605611595, Toshkent, Oʻzbekiston) boshqaradi. Bogʻlanish yoʻllari Aloqa sahifasida.

2. Mijozdan qanday maʼlumot yigʻiladi

Kometada shaxsni tasdiqlash majburiy emas. Sartaroshxona devoridagi QR kodni skanerlab, roʻyxatdan oʻtmasdan ham navbatga qoʻshilish mumkin. Quyidagilardan faqat siz bergan yoki xizmat ishlashi uchun zarur boʻlganlari saqlanadi:

• Telefon raqami — ixtiyoriy. Sartaroshxona sizni tanishi va eslatma yuborishi uchun.
• Ism — ixtiyoriy, sartaroshning roʻyxatida koʻrinishi uchun.
• Til — eslatma qaysi tilda yozilishini bilish uchun.
• Band qilishlar tarixi — qaysi sartaroshxonada, qachon, qaysi xizmat va oʻsha paytdagi narx. Narx va davomiylik oʻsha kunning nusxasi sifatida saqlanadi.
• Sharhlar va baholar — faqat siz yozgan boʻlsangiz. Sharh yozish uchun oʻsha kursida oʻtirgan boʻlish shart.
• Sodiqlik kartasi hisobi — sartaroshxona bunday karta yuritsa.
• Telegram identifikatori — faqat siz botga oʻz raqamingizni ulashsangiz. Bepul eslatma yuborish uchun.
• Google hisob identifikatori — faqat Google orqali kirsangiz. Parolingiz bizga hech qachon kelmaydi.
• Push token — ilova oʻrnatilgan boʻlsa, xabar yetkazish uchun.

Cookie

Saytda bitta cookie bor: kometa_anon_id. U tasodifiy raqam, ismingiz yoki raqamingiz emas. Vazifasi bitta — shu qurilmadan qilingan band qilishni keyin ham koʻra olishingiz va bekor qila olishingiz. 365 kun saqlanadi, HttpOnly va Secure. Reklama yoki analitika uchun ishlatilmaydi va uchinchi tomonga uzatilmaydi.

Joylashuv

«Yaqin atrofda» qidiruvi brauzerdan joylashuvingizni soʻraydi. Koordinatalar serverga faqat qidiruv doirasini hisoblash uchun yuboriladi va saqlanmaydi — na bazada, na profilingizda. Ruxsat bermasangiz, qidiruvni shahar boʻyicha qoʻlda tanlaysiz.

3. Biznesdan qanday maʼlumot yigʻiladi

• Sartaroshxona nomi, manzili, shahri va xaritadagi nuqtasi — bular ommaviy sahifada koʻrinadi.
• Egasi va xodimlarning telefon raqami, ish vaqti, xizmatlar va narxlar.
• Toʻlov tizimi kalitlari (Click, Payme) — agar oldindan toʻlov yoqilgan boʻlsa. Ular Toshkentdagi serverimizda alohida jadvalda saqlanadi, hech qachon ommaviy sahifaga chiqarilmaydi va faqat oʻsha sartaroshxonaning oʻz hisobiga toʻlov oʻtkazish uchun ishlatiladi. Kalitlarni istagan vaqtda kabinetdan oʻchirib tashlashingiz mumkin.
• Obuna va toʻlov tarixi.

4. Sartaroshxona joylashtiradigan surat va videolar

Sartaroshxonalar oʻz ishini koʻrsatish uchun suratlar, qisqa videolar va «oldin/keyin» juftliklarini joylashtiradi. Bu material ommaviy: uni Kometa ilovasidagi lentada va sartaroshxona sahifasida hisobi boʻlmagan har qanday odam ham koʻra oladi. Uni Kometa emas, sartaroshxonaning oʻzi joylashtiradi.

«Oldin/keyin» surati — aniqlanadigan shaxsning tasviri, yaʼni mijozning yuzi. Uni joylashtirayotgan sartaroshxona mijozning roziligi borligini tasdiqlaydi, va bu tasdiq oʻz vaqti bilan birga yozib qoʻyiladi. Rozilik bermagan boʻlsangiz yoki fikringiz oʻzgargan boʻlsa — Aloqa sahifasi orqali yozing, surat olib tashlanadi.

Har qanday materialdan shikoyat qilish mumkin, buning uchun hisob shart emas. Shikoyat qilinganda shikoyatchining belgisi — hisobingiz yoki brauzeringizdagi anonim cookie — yozib qoʻyiladi. Bu bir odam bir materialdan qayta-qayta shikoyat qilib navbatni toʻldirmasligi uchun kerak.

Material olib tashlanganda u darhol koʻrinmay qoladi. Fayllarning oʻzi yana 30 kun saqlanadi — xato bilan olib tashlangan boʻlsa qaytarish uchun — soʻng butunlay oʻchiriladi.

5. Nima uchun ishlatiladi

• Band qilish, navbat va kalendarni yuritish.
• Eslatma va tasdiqnoma yuborish — imkon boʻlsa Telegram yoki push orqali (bepul), boʻlmasa SMS orqali.
• Sodiqlik kartasi va chegirmalarni hisoblash.
• Suiisteʼmol va soxta sharhlarning oldini olish.
• Qonun talab qilgan hisob-kitob va soliq hujjatlari.

Yigʻilgan maʼlumot boshqa maqsadda ishlatilmaydi. Marketing xabarlarini yuborish uchun raqamingiz uchinchi tomonga berilmaydi.

6. Kim koʻradi

• Siz band qilgan sartaroshxona — ismingiz, raqamingiz va oʻsha band qilish tafsilotlarini koʻradi. Bu xizmatning mohiyati.
• Telegram — eslatma bot orqali yuborilsa.
• Google (Firebase) — ilovaga push xabar yetkazish, nosozlik hisobotlari va ilova statistikasi uchun. Veb-saytda ishlatilmaydi.
• SMS operatori — SMS yuborilsa, raqamingiz va xabar matni.
• Click va Payme — oldindan toʻlov qilinsa. Toʻlov sartaroshxonaning oʻz hisobiga tushadi; karta maʼlumotlaringiz Kometaga kelmaydi va bizda saqlanmaydi.

Bundan tashqari maʼlumot faqat qonuniy asos boʻlgandagina — vakolatli davlat organining rasmiy talabi boʻyicha — beriladi.

7. Qayerda saqlanadi

Kometaning maʼlumotlar bazasi va yuklangan rasmlar Oʻzbekistonda, Toshkentdagi serverda saqlanadi. Ulanish TLS bilan shifrlangan.

Istisno — 6-boʻlimda sanab oʻtilgan uchinchi tomon xizmatlari. Ular oʻz serverlarida ishlaydi, va bu serverlar Oʻzbekistondan tashqarida boʻlishi mumkin:

• Telegram — bot orqali yuborilgan xabarlar;
• Google (Firebase) — mobil ilovaga push xabar, nosozlik hisobotlari va ilova statistikasi. Veb-saytda ishlatilmaydi;
• SMS operatori — SMS yuborilganda raqam va xabar matni.

Bu xizmatlarga faqat oʻz vazifasini bajarish uchun zarur boʻlgan maʼlumot yuboriladi — band qilishlar tarixi ham, sharhlar ham ularga berilmaydi.

8. Qancha saqlanadi

Band qilishlar tarixi hisob oʻchirilmaguncha saqlanadi — sartaroshxonaga oʻz mijozlar bazasi kerak. Hisobingizni oʻchirishni soʻrasangiz, ism va telefon raqami oʻchiriladi; moliyaviy hujjatlar qonun talab qilgan muddat davomida saqlanib qoladi.

Joylashtirilgan surat va videolar sartaroshxona ularni oʻchirmaguncha turadi. Olib tashlanganidan keyin fayllar yana 30 kun saqlanadi — 4-boʻlimga qarang.

9. Sizning huquqlaringiz

Oʻzingiz haqingizdagi maʼlumotni koʻrish, tuzatish va oʻchirishni soʻrashingiz mumkin. Bir soʻrov yetarli — Aloqa sahifasidagi yoʻllardan biri orqali yozing. Javob 30 kun ichida beriladi.

Hisobni butunlay oʻchirish yoʻllari: Hisobni oʻchirish.

10. Bolalar

Xizmat 18 yoshga toʻlmaganlarga qaratilmagan. Voyaga yetmagan bolangiz uchun navbat olsangiz, uni oʻz nomingizdan qilishingizni soʻraymiz.

11. Oʻzgarishlar

Bu siyosat oʻzgarsa, yangi sana shu sahifada koʻrsatiladi. Muhim oʻzgarish boʻlsa, hisobi bor foydalanuvchilarga alohida xabar beriladi.